बाल प्रहरी के संपादक उदय किरौला का उत्तराखाड़ियों के नाम पत्र

शुभ स्थान – अल्माड़
भादो 7 पैट, वृहस्पतिवार
22 अगस्त,2024

सिद्धीश्री सर्वोपमा योग्यवर-6
आमा-बुबू, ठुल ईजा-ठुल बौज्यू, कका-काकी,ममा-मामी और सबै ठुला कैं म्येरि पैला और ननां कैं प्यार आशीष।
उत्तराखंड में विधान सभा मानसून सत्र 21 अगस्त हूं गैरसैण में शुरू हैगो। विधान सभा सत्रा पैल दिन गैरसैण बटी खबर ऐरै कि गैरसैण सत्र में सरकारल विधायकों तनखा और भत्त बढ़ै हाली। आब विधायक और पूर्व विधायक आपुण इलाजा लिजी विदेश लै जै सकनी। हमार गौंक सभापति ज्यू कूनी कि रनकरो आपुण तनखा भत्ता बढ़ाणा लिजी गैरसैण ऐ रछा। गैरसैण में गैरसैणा विकासा लिजी, पहाड़ा विकासा लिजी क्ये करना। विदेश में इलाज करणा बजाय आपुण पहाड़ में क्वे ठुल अस्पताल खोलणै बात करना।आपुण भत्त बढ़ाणा लिजी गैरसैण किहूं आछा ये है तो देहरादून मजै आपुण भत्त बढ़ै लिना। गैरसैण में बारिश हुणा वजैल नेता लोगों खूब फजीत हैरै बल। सुणाई में एैरै कि हरीश रावत ज्यू लै गैरसैण में धरना दे कबै। हरीश रावत ज्यू जब मुख्यमंत्री छी। उनेरि नजर भीं पन निछी। आब खालि नेतागिरी करि बे क्ये फैद नहां। सभापति ज्यू कूनी कि एक न एक दिन लोग अलग पहाड़ी राज्य और पहाड़ राजधानी बात कराल। उ बखत सारै नेताओं छीछालेदरी होलि। य लिजी आज लै बखत छू। पहाड़ै राजधानी पहाड़ में बणाओ।
अलबेर पहाड़ पन जन्यो पुन्यो दिन खूब चहल-पहल है रछी। पंडि ज्यू पातौड़ में धुपरि कै रक्षा बंधनौ मुहुर्त छी। जादेत्तर लोगूंल रतै पर नै धोई बे रक्षा बाधण चाल करि दे। क्वे रेल में जाणी छी क्वे बस में। य वजैल लोगूंल आपुण हिसाबैल रक्षा बांधणौ काम करौ। कुछ लोगूंल रतै नै धोई बे जन्यो बदलि ले। क्वे जगां आजि लै जन्यो पुन्यो दिन रतै पर तर्पण करि बे लोग जन्यो बदलनी। पंडि ज्यूल धुपरि कै तर्पण करा। वी बाद लोगूंल जन्यो बदली। पैली बटी लाल डोर वाल रक्षा बजार पन खूब बिचांछी। आब तो एक है एक रक्षा गौं बाखई दुकानों में लै बिचाण रयीं। क्वे दीदि बैणियांल रक्षा लिफाफ में धरि बे डाक में लै भेजै छन। पंडि ज्यू लोग लै जन्यो पुन्यो दिन सारै जजमानौ कैं रक्षा बादण हूं गयीं। पैली बटी पंडि ज्यू लोग द्वि-तीन महैण पैली बटी कतू में काति बे जन्यो तैयार करछी। आब बजारौं पन जन्यो दैल फैल हैरै। घरौं पना लोग तो बामण ज्यू पतेस्यी जन्यो पैरनी। बजार पना लोग दुकान बटी खरीदि बे जन्यो पैरण रयीं।
रक्षा बंधना दिन सबूं है जादे फजीत घर पना स्यैणियांक हौछ। फ्री गाड़ी चक्कर में दाद भुला कैं रक्षा बाधणा लिजी तैयार है रछी। ब्याखुलि तक रोडवेज नि आई। आपुण जा गिजां कै लिबे वापिस घर हूं ऐ पड़ीं। हमार गौंक सभापति ज्यू कूनी कि रोज अखबार में छपण रौ कि आज अल्मोड़ा डिपो चार गाड़ि नि गाई। आज बागेश्वर डिपो गाड़ि आदु बाट में खराब है पड़ी। य बाद लै लोगूंल सरकार पर आस लगै रछी। बहरहाल जन्यो पुन्यो दिन लोगूंल एक है एक पकवान बणै बै खायै छन। त्यार-ब्यार हूं गरीब दुबाउ लोग लै उधार लिबेरै सही पुरि पकवान बनानै छन। य महैण 26 अगस्त यानी 11 पैट जन्माष्टमी ब्रत छू। व्रता कौतिका लिजी मंदिरौ साफ सफाई चलियै छू। लोग चुवा लड्डू बनाण में लागि रयीं। हमार गौंक सभापति ज्यू कूणी कि नेता लोग देश-परदेस में एक है एक ठुल मंदिर बनाण रयीं। आपुण गौं घरौं मंदिरौं उज्याणि क्वे नि चाण राय।
पहाड़ा स्कूलों में पंदर अगस्त बाद स्कूलों में पढ़ाई चाल हैगे। स्कूलों में खेद कूद लै चलियै छन। मास्टर सैप आजि लै आपुण बदई चक्कर में लागि रयीं। सरकारि स्कूलों में नना कै दाल भात मिलणै रौ। मास्टर सैप भाता जुगाड़ में लागि रूनी। जादेत्तर नान प्राइवेट स्कूलों में न्है गयीं। पैली बटी नान स्कूल कै ठुल बणाओ कै लोग मांग करछी। आब हाईस्कूल, जूनियर हाईस्कूल और प्राथमिक स्कूल बंद होते जाणीं। सरकार लै मनमनै खुशि हैरै। सब प्राइवेट स्कूल में न्है जला तो सरकारैकि बचत है जालि। य लिजी सरकार भतेर भतेरै सरकारि स्कूलों कें बंद करणै स्कीम में लागि रै। डबल वाल लोग पब्लिक स्कूल में पढ़ि ल्याल। गरीब दुबाउ और मजदूर लोगों नना क्वे ग्वाउ गुसै नहां।
पहाड़ पन चौमास में बुड़ बाड़ी आंग चसकन-बिसकन है जाणौ। जर बुखार और खांस नि छोड़ण रौय। एक है एक नई बीमारी लागण रयीं। आपुण ज्यानै हिफाजत करीया, तबै पालना होलि।
बांकि फिर लेखूल

उदय किरौला
संपादक बालप्रहरी
सचिव बालसाहित्य संस्थान
दरबारीनगर अल्मोड़ा उत्तराखंड
मोबाइल 9412162950